Sunday, October 11, 2020
Ann ret konekte ak Peyi w


Federasyon Potestan voye jete deziyasyon Guy Roméus nan Konsèy Elektoral Jovenel Moïse la kòm reprezantan yo

Tweet Dimanch 27 septanm 2020 (rezonodwes.com))– Federasyon Potestan d’Ayiti (FPH), enstans ki reprezante Kil refòme yo devan Leta ayisiyen, konstate…

By Rezo Nodwes , in ACTUALITÉS , at September 27, 2020 Tags: ,

img

Dimanch 27 septanm 2020 (rezonodwes.com))– Federasyon Potestan d’Ayiti (FPH), enstans ki reprezante Kil refòme yo devan Leta ayisiyen, konstate Pouvwa Egzekitif la pibliye yon arete nan Le Moniteur # 151, nan dat 18 sektanm 2020, ki fòme yon nouvo Konsèy Elektoral Pwovizwa ki gen non sitwayen Guy Roméus kòm reprezantan sektè potestan peyi d Ayiti.

FPH vle fè tout peyi a ansanm ak kominote entènasyonal la konnen ke Federasyon Pwotestan d Ayiti te reponn yon lèt Direktè kabinè Prezidan Repiblik la te ekri li 24 out 2020 pou mande li chwazi yon reprezantan sektè potestan an pou fòmasyon yon KEP. Nan repons FPH te voye bay Direktè kabinè prezidan Repiblik la 3 septanm 2020 an, li te fè li konnen aklè li p ap voye reprezantan sektè potestan an nan KEP pou rezon sa yo:

1. Prezidan an ak gouvènman li an pa di anyen sou pil dekrè ki pa respekte konstitisyon an epi ki imoral yo te pibliye yo, espesyalman dekrè sou Nouvo Kòd Penal la ki gen yon pil atik ki te lakòz majorite sosyete a pwoteste divès fason. Tout sektè potestan an denonse desizyon sa yo nan laprès, nan mach ak nan petisyon yo. Pouvwa Egzekitif la pa okipe yo.

2. FPH te reproche Pouvwa Egzekitif la ,lè li fè tout sa li kapab pou li divize sektè a, lè Direktè kabinè prezidan an te voye lèt bay plizyè òganizasyon potestan pou mande yo chwazi yon reprezantan pou sektè potestan an nan KEP a malgre se FPH Leta toujou kontakte pou demach sa a depi Konstitisyon 1987 la egziste.

3. FPH te eksprime enkyetid li devan klima sosyo-ekonomik, sosyo-politik ansanm ak ensekirite jeneralize ki blayi tout kote nan peyi a. Li te di Direktè kabinè prezidan an se pou genyen yon klima sekirite ki garanti respè dwa tout moun ak lapè nan sosyete a .

Menm jan ak tout sosyete a, se nan medya Federasyon Potestan d Ayiti (FPH) ki se sèl enstans ki reprezante sektè potestan an (Kil refòme yo) devan Leta ayisyen te tande gen yon pastè Guy Roméus yo nonmen kòm reprezantan sektè potestan an nan KEP sa a. Federasyon an fè tout moun konnen sektè Potestan an pa voye okenn reprezantan nan KEP sa a.

FPH pa te patisipe nan okenn desizyon konsa.Federasyon an mande prezidan ak tout gouvènman an pou yo resezi yo, pou yo swiv la rezon, pou yo chache bon jan kompromi ak ladrès pou yo rezoud problèm sosyo politik yo, problèm ekonomik yo, problèm enjistis k ap taye banda tout kote ak ensekirite sa a ki jiska prezan ap kontinye touye moun, boule kay, rann lavi pèp la pi di toujou nan katye popilè yo, tankou Delma 2, Delma 4, Delma 6 ak sou Bèlè.

Federasyon an mande pèp Bondye a, lidè ak pastè potestan nan tout peyi a pou yo priye san rete nan legliz ,nan tout aktivite espirityèl yo ap fè pou Bondye fè peyi a gras. »Lè ou pa pran konsèy, plan travay ou p ap mache. Lè ou pran konsèy nan men anpil moun, ou mèt sèten travay ou ap mache byen. » Pwoveb 15:22.

Se pou Bondye beni Ayiti.

%d bloggers like this: